曼联喺美国嘅热身之旅非常忙碌，星期四(27日)朝早对皇家马德里前，周三(26日)先安排B队同英乙嘅域斯咸「拍跳」，虽然坦哈格亲自督师兼有庄尼伊云斯领军，但曼联一众新人踢到失控，最终10人应战下输1比3。
曼联今场派B队上阵，早前回巢嘅庄尼伊云斯带住一班新人出赛，不过面对域斯咸体力化踢法明显应付唔到，门将弥敦比索早前鲁莽冲出禁区撞跌域斯咸前锋穆连，搞到对方要吸住氧气离场入医院检查，如果唔系庄尼伊云斯包番最後防线，弥敦比索唔止拎黄牌。
域斯咸主力受伤後反而踢得更进取，喺29分钟同36分钟连入2球，曼联就喺上半场补时由19岁西班牙右闸祖拉度破蛋。换边後1分钟，曼联中场哥尔因粗野拦截食红牌，域斯咸喺69分钟入多一球，最终呢支威尔斯球队喺超过3万观众入场下，3比1击败曼联。
