曼联上仗美国之旅热身赛，以2比0击败阿仙奴，赛後迎来一位星级嘉宾，就系美国着名女星茱莉亚罗拔丝，佢唔止入场睇波为爱队红魔鬼打气，仲去探班参观曼联训练大营。由於曼城主帅哥迪奥拿一直视茱莉亚罗拔丝为偶像，网民趁机抽水，寸哥帅又输畀曼联。
茱莉亚罗拔丝去到曼联训练大营，获得球队上下热情招呼，领队坦哈格、射手拉舒福特、中场卡斯米路等球员都变成小影迷，同佢合照。曼联亦送咗1件印有茱莉亚罗拔丝名字嘅1号球衣，以及利辛度马天尼斯6号球衣畀佢。
值得一提，茱莉亚罗拔丝系哥迪奥拿心目中嘅「女神」，但却属於曼联球迷，令哥帅一直耿耿於怀，曾经讲笑话茱莉亚罗拔丝2016年造访曼市，选择咗去曼联嘅奥脱福球场，令佢觉得好失望，甚至话就算赢欧联冠军，但赢唔到茱莉亚罗拔丝芳心，觉得自己系「失败者」。
