希拉尔提出以破世界纪录嘅3亿欧元(约26亿港元)收购基利安麦巴比，并向佢开出7亿欧元(约60.5亿港元)年薪，震撼全球体坛，连效力密尔沃基公鹿嘅NBA球星「字母哥」安迪杜甘普都非常羡慕，喺社交网发表话：「希拉尔签我啦，我个样似麦巴比。」更加吸引麦巴比转载贴文，以大笑表情符号回应，似乎好赞同对方。
安迪杜甘普曾协助公鹿夺得2021年NBA总冠军，亦当选过2次NBA最有价值球星，年薪近4,000万美元(约3.1亿港元)，但相比起希拉尔向麦巴比提供嘅薪酬合约，简直系小巫见大巫，难怪佢不惜「出卖色相」，话自己貌似麦巴比，希望加盟呢支沙特豪门。不过，「字母哥」贴文都加上大笑表情符号，应该系讲笑，同时带有讽刺性质，暗寸希拉尔挥金如土。
最搞笑系贴文引起麦巴比注意，喺自己社交网转载贴文，虽然只系加上几个大笑表情符号，但已被指佢首度「回应」希拉尔要收购佢嘅消息，至於麦巴比「笑而不语」，到底系开心可以获得肥约，亦或嘲笑安迪杜甘普，相信只有佢自己先至知。
