法国球星基利安麦巴比被爆暗中同皇马有秘密转会协议之後,被所属球会巴黎圣日耳门(PSG)踢出亚洲之旅大军名单,好戏陆续有来,根据法国媒体《RMC Sport 》爆料,如果麦巴比喺7月31日前仍然拒绝续约,PSG就会接受希拉尔2亿欧元(约17.4亿港元)报价,将佢出售畀呢支沙特阿拉伯豪门。
基利安麦巴比只剩下1年合约,早前已表明唔会续约,同时拒绝转会,因为只要等到明夏约满,就可以获得9,000万欧元(约7.8亿港元)忠诚金,所以就算下季全季冇得上阵都唔介意。
PSG方面当然唔想畀基利安麦巴比自由身离队,导致人财两失,已开始搵买家,要求1.5亿欧元以上转会费,但欧洲球坛难有球会愿意出呢个价钱买1位仅余1年合约嘅球员。不过,沙特阿拉伯球会就例外,希拉尔愿意畀够2亿欧元转会费,同时向麦巴比提供一份4亿欧元(约34.8亿港元)年薪嘅3年合约。