女子世盃惊爆「三角恋」戏码！东道主澳洲女足周四(20日)首战1比0赢爱尔兰女足，澳洲球星姬莲科特同爱尔兰球星列图祖恩喺比赛中发生冲突，日前被爆原来牵涉「三角关系」。传闻列图祖恩喺决赛周前同相恋7年嘅队长麦姬比分手，而姬莲科特就系破坏两人关系嘅「第三者」。
今场比赛气氛古怪，列图祖恩喺赛前握手仪式中，去到姬莲科特面对突然收手拒绝接触，去到比赛尾声，列图祖恩更怒气冲冲走向姬莲科特「问罪」，不过当时比赛未完，队友即刻将列图祖恩拉走，估唔到原来当中涉及感情瓜葛。
爱尔兰队长麦姬比喺决赛周前，宣布同拍拖7年嘅列图祖恩分手，有传麦姬比系同佢喺阿仙奴嘅队友姬莲科特「挞着」，有网民发现佢哋早前曾经同一班朋友去西班牙度假，所以姬莲科特被质疑「撬墙脚」。姬莲科特本身亦系同阿仙奴嘅瑞士球星莉亚华迪拍拖，但冇耐之前亦证实分手。
