C朗拿度喺沙特阿拉伯嘅足球生涯继续面临困境，继上场热身赛吞切尔达5蛋後，周五(21日)凌晨艾纳斯第2场热身赛，再以1比4惨败宾菲加脚下。C朗今场继续冇入波之余，更被35岁嘅迪马利亚当面用神奇球技扭过，C朗情急下要用超技术推跌对方，真系冇晒面！
艾纳斯今场对宾菲加，令C朗重返葡萄牙比赛，不过主角就落喺佢前皇马队友、今夏回归宾菲加嘅迪马利亚身上，呢位阿根廷球星23分钟就禁区内过人再施展招牌笠射入波，喺上年世盃抢走C朗正选嘅干卡路拉莫斯，31分钟同36分钟连入2球，艾纳斯到43分钟前先至破蛋。
完半场前C朗再经历尴尬一幕，佢返中场帮手抢波嗰阵，迪马利亚喺佢面前凌空控个波落嚟，再剔过头巧妙扭过C朗，扑空嘅C朗唯有出术将迪马利亚推跌，影片被网民疯传後，唔少球迷都指35岁嘅迪马利亚竞技水平远高於38岁嘅C朗。宾菲加喺下半场再入1球，最终4比1大胜艾纳斯。
