哈利马古尼被褫夺队长後心灰意冷，近日向曼联提出离队条件，就系要球队为佢余下两年合约支付2,000万镑(约2亿港元)，收到钱先肯离队。
马古尼系曼联今夏挂牌出售球员之一，期间曾有多队提出收购同借用，但都倾唔成，例如韦斯咸同国米提出借用，车路士同纽卡素打算收购，可惜马古尼人工太高未能成事，沙特方面又冇动静，令马古尼暂时留队，不过佢前面有华拉尼、利辛度马天尼斯、域陀连迪路夫同可客串中坚嘅劳基梳尔，马古尼沦为第5人选。
曼联同马古尼合约仲有两年，至2025年约满後，仲有1年延长条款，现时佢周薪为19万镑(约190万港元)；本来马古尼对曼联仍然有归属感，打算凭努力争取上阵机会，但被褫夺队长令佢改变想法，考虑离队。
