曼联全军展开集训即爆出「队长风波」！星期六(15日)正式归队嘅哈利马古尼，返曼联後即被领队坦哈格通知佢嘅队长职务已被褫夺，呢位英格兰国脚周日(16日)喺社交网发出长文证实，表明对呢个决定「极度失望」。据报哈利马古尼依家非常愤怒，将考虑如坦哈格所愿离开曼联，传闻车路士有意接收。
30岁嘅哈利马古尼喺2019年夏天加盟曼联，半年之後即接替艾舒利杨格成为队长，不过随住坦哈格上任，哈利马古尼已经唔喺球队组军计划内，坦哈格上月亦曾催促佢尽快为去留作出决定。哈利马古尼周六结束度假归队後，第一个接到嘅消息就系被褫夺队长职务。
哈利马古尼喺twitter发声明：「今日同领队倾过，佢通知我佢决定更换队长，佢有解释咁做嘅原因，虽然我觉得极度失望，但只要我每次着起曼联波衫都会倾尽全力。多谢球迷喺我做队长期间嘅无限支持，由我3年半前接受呢个任务开始，以队长身份带领曼联出赛系我足球生涯最大光荣...我会永远感激苏斯克查决定畀我做队长，我亦会祝福同支持下一任队长取得成功。」
哈利马古尼对呢个决定「愤怒、震惊同伤心」，佢嘅声明中亦冇提到「坦哈格」，只系用「领队」嚟交代，反而提及感激前领队苏斯克查就直接开名。报道指哈利马古尼一直属意留喺曼联争正选，尤其新一季要应付欧联会有唔少机会，但今次「队长风波」可能会令佢重新考虑，而曼联下任队长据报将会系般奴费南迪斯。
