多间英国传媒报道，曼联同拉舒福特达成续约协议，续约5年至2028年，周薪暴升至37.5万镑(约383万港元)，成为英超第4高薪球员。
《The Athletic》报道，正在参加曼联季前集训嘅拉舒福特，原则上同意同曼联续约5年，续约谈判已到尾声，报道指，拉舒福特收到来自欧洲及英超嘅高价邀请，但「福仔」不为所动，佢仍然希望留喺曼联。
7岁加入曼联青训嘅拉舒福特，2016年升上一队至今，上阵359场入123球，上季喺坦哈格麾下上阵56场入30球11助攻，帮球队捧英联盃同重返欧联，绝对系举足轻重。
《每日邮报》报道，原估计拉舒福特会轻微加人工至周薪25万镑，但最终结果系周薪暴升至37.5万镑，亦即原本迪基亚嗰份人工，迪基亚离队後，成份粮畀咗「福仔」，至於曼联重整人工架构嘅构想，亦变成空谈。
