上季英超争冠失败嘅阿仙奴，今个暑假积极扩军，今晚进行首场正式季前热身赛，作客德国对「老对手」纽伦堡。「兵工厂」今次集训阵容大兜乱，相信试阵为主，旨在畀球员重拾状态，战术执行唔会太严谨，好大机会变成打乱章嘅「入球骚」，两军上次拍跳入够8粒，重演历史唔奇。（周五凌晨1时开赛）
阿仙奴上季季前热身，首站咁跷又系作客德乙纽伦堡，今季照办煮碗。当时佢哋由新加盟嘅加比尔捷西斯梅开二度，喺落後两球情况下反胜5比3。今仗阿仙奴同样有新加盟嘅夏维斯等住落场表演，呢位德国国脚已跟操几日，虽然同马田奥迪加特及布卡约沙卡等新队友默契有待加强，但单靠个人质素都够搵到入波。
由於一众主力归队冇耐，预料阿仙奴今场只会畀佢哋踢半场，大量年轻球员获上阵机会，包括两位16岁新星华尼利同史基利，加上外借回归嘅巴洛根及马昆奴斯等小将，领队阿迪达将以试阵为主。睇番阿仙奴对上5季首场热身赛，总入球都系3球或以上，相当抢缰。
