巴西球星韦利安上季加盟富咸，表现出色帮球队排英超第10位，佢交出5个入波同5次助攻表现大获好评，不过随住佢同富咸合约6月底结束，双方仍未就续约达成共识，据报韦利安留队机会唔大，盛传佢将加盟人生第4间伦敦球会──水晶宫。
34岁嘅韦利安10年前加盟车路士，效力7季之後转投阿仙奴，可惜表现差劲，2年前返巴甲踢哥连泰斯。势估唔到上年仲有机会重临英超，以领袖身份带领富咸杀上中游，领队马高施华亦想佢继续留队，但富咸只愿意开出1年合约，令韦利安拒绝续约。
事实上，韦利安家人一直好锺意伦敦生活，所以每次转会都以伦敦球会为首选，今次离开富咸亦唔例外，据《teamtalk》报道，伦敦球会水晶宫对呢位巴西翼锋甚有兴趣，希望佢可以取代离队嘅韦费特沙夏。
