英格兰勇夺U21欧国盃冠军，一众小将都有出色表现，其中串演前锋嘅安东尼哥顿，今届赛事有2个入波同1次助攻，加上整体嘅突出发挥，决赛後获选为今届赛事嘅最佳球员，亦系自1984年嘅希利之後，第2个赢得U21欧国盃MVP嘅英格兰球员。
今年1月先由爱华顿转投纽卡素嘅安东尼哥顿，原本主打翼锋位置，不过今届串演前锋都有好表现，佢得奖後表示：「我赢到呢个个人奖项，都系多得队友同教练，呢支英格兰非常无私，6至7个球员都有资格拎呢个奖，证明我哋系支好好嘅球队。」
英格兰对上一次赢U21欧国盃系1984年，当届有5名球员有份出战1986年世盃，今次呢支「冠军小狮」，亦有部份球员被睇好可以晋升大国脚，占士查科特嘅精彩表现，有机会短期内进占国家队3号门将位置，安东尼哥顿可锋可翼嘅踢法，亦有机会争夺哈利卡尼箭头接班人位置。
其他被睇好有力晋升嘅球员，包括车路士中坚高维尔、诺定咸森林中场基比斯韦特，而阵中唯一一个代表过英格兰国家队嘅伊美路维，同样系英格兰领队修夫基嘅重点考察对象。
近10届U21欧国盃MVP
2023●安东尼哥顿(英格兰)
2021●法比奥韦拉(葡萄牙)
2019●法比安彭拿(西班牙)
2017●丹尼施巴路斯(西班牙)
2015●威廉卡维奴(葡萄牙)
2013●堤亚高艾简达拿(西班牙)
2011●桑马达(西班牙)
2009●马古斯贝治(瑞典)
2007●德伦特(荷兰)
