周日(9日)凌晨U21欧国盃决赛，英格兰U21戏剧性1比0力克西班牙U21，相隔39年後再度封王，亦系英格兰各青年梯队近6年第5个重要赛事锦标。英格兰门将占士查科特今场系最大功臣，佢喺补时9分钟神救12码，加上今届6场赛事未失1球，完美表现为佢赢得上位机会，般尼已用1,900万镑(约1.9亿港元)将佢收购，新季将喺英超担正。
今场决赛激战火药味浓，英格兰完半场前禁区边获得罚球，高尔彭马主射省中居迪斯锺斯背脊入网，英格兰凭一个幸运入球领先。庆祝期间双方後备席发生冲突，英格兰助教艾殊利高尔同西班牙体能教练李维拉双双被逐。西班牙下半场疯狂抢攻，艾比雷斯51分钟曾经顶入，但被判越位在先惨食诈胡。
去到补时阶段出现高潮，英格兰中坚高维尔禁区内侵犯艾比雷斯输12码，好在占士查科特英勇救驾，佢先扑出艾比雷斯嘅主罚，起身再挡出艾马奥路斯嘅补射，双方後备随即再起冲突，两名已被换走嘅球员基比斯韦特同安东尼奥白兰高各领红牌，但无阻英格兰U21勇夺冠军。
英格兰青年军近年表现神勇，今次赢U21欧国盃嘅班底，就系6年前赢世少盃(U17世盃)嘅梯队，期间英格兰青年军仲拎过U20世盃(2017)同2次U19欧国盃(2017、2022)冠军。英雄占士查科特赛後表示：「我赛前已同队友讲，我会喺决赛救出12码，呢个不失球纪录意义重大，我哋相信冇人可以攻入英格兰大门。」
