车路士今年1月以8,800万镑(约8.8亿港元)高价签入梅迪历，但呢位22岁翼锋表现令人失望，踢咗半季都系0入波，被球迷猛烈批评。不过梅迪历今夏主动要求出战U21欧国盃，8强首度登场即大发神威，连传奇球星舒夫真高都撑佢「唔系水货」！
梅迪历为争取比赛状态，已成为大国脚嘅佢主动要求出战U21欧国盃，分组赛佢因伤未有上阵，不过8强对法国U21登场就光芒四射，先系一次精彩盘扭博到12码，再用一记後半场超级助攻帮乌克兰U21赢波，影响力非常大。
曾经效力车路士被评为「水货」嘅舒夫真高，就力撑後辈会有个成功嘅车路士生涯：「梅迪历好後生，都充满信心，佢知道自己嘅能力，而且车路士同佢签8年长约，新领队普捷天奴似乎亦好相信佢，只要畀时间佢，梅迪历会喺车路士发光发热，到佢约满再评价都未迟！」
