曼联新星阿历真度加拿祖刚於7月1日度过19岁生日，佢「庆生」相片流出，引起牵然大波，皆因相中有2位分别身穿阿根廷及葡萄牙球衣嘅侏儒症人士，拎住印有7号嘅生日蛋糕同加拿祖合照，网民批评呢位翼锋太嚣张自大，唔止妄自尊大，吼住传奇7号球衣，仲有暗踩两位球王美斯同C朗之嫌。
据悉阿历真度加拿祖邀请一众好友，出席佢嘅生日派对，又影相又拍片，最争议性一幕出现喺推出生日蛋糕环节，2位患有侏儒症人士分别身穿阿根廷及葡萄牙球衣，一齐拎住蛋糕出场，问题系加拿祖同葡萄牙扯唔上关系，唔明点解其中1位推蛋糕出场嘅人士会着葡萄牙波衫，二来请患有侏儒症人士推出蛋糕，令人联想起阿根廷球王美斯曾经患有侏儒症。因此，网民认为派对搞手有心贬低美斯同葡萄牙球星C朗，借2位侏儒症人士陪衬加拿祖。
另一个争议点系蛋糕上除咗有19字样代表阿历真度加拿祖19岁生日，同时有7字，亦令人费解，皆因加拿祖喺阿根廷及曼联都唔系着7号，令人怀疑佢自己「加冕」成为传奇7号。
此外，阿历真度加拿祖嘅社交网Instagram「粉丝」日前突破700万大关，佢发放一张合成照庆祝，背部有7字，下面有百万字样，再次令人联想加拿祖已经将7号视为囊中之物。不过，阿根廷国家队7号属於迪保罗，加拿祖此举明显唔尊重队友，至於曼联7号自C朗离队之後一直悬空，加拿祖似乎想为自己造势，争取获得呢件代表王牌嘅球衣。
