英格兰国脚占士麦迪臣日前由李斯特城转投热刺，避过踢英冠嘅尴尬局面，而且好事成双，女友Kennedy Alexa近日为佢诞下一对龙凤胎，睇来呢位26岁中场球星新一季有运行。
占士麦迪臣同女友本身已经有1位18个月大嘅囝囝，两人依家再宣布有新家庭成员加入，就系一对龙凤胎，取名为Delilah、Rome。占士麦迪臣双手抱住两位BB合照放上社交网，话：「我嘅美丽BB。」热刺官方社交网亦有分享占士麦迪臣嘅喜讯。
祖迪比宁咸、基亚利殊、佐敦轩达臣、兰斯达尔等英格兰国家队成员都纷纷留言祝贺，网民讲笑话，占士麦迪臣场外「梅开二度」，为迎接新一季打响头炮。
事实上，占士麦迪臣近2季英超入波都达双位数，热刺有呢位猛将加盟，下季成绩有望回升。
