美臣蒙特正式加盟曼联，据报「红魔鬼」以6,000万镑(约6亿港元)签入呢名24岁中场，6,000万镑包含5,500万镑固定款项及500万镑浮动奖金，双方签约至2028年6月，并有1年自动续约条款。而美臣蒙特获大幅加人工，由车路士逗紧10万镑(约100万港元)周薪，一次过加到25万镑(约250万港元)，加咗1.5倍，更加穿上名宿简东拿、碧咸、C朗着过嘅传奇7号波衫，誓要省靓「金7招牌」。
曼联今夏喺转会市场一直冇乜声气，不过传媒一直对佢哋签入美臣蒙特颇为乐观，如今呢位英格兰国脚终於正式入魔，亦系曼联今夏首签。美臣蒙特接受曼联官网访问时表示离开车仔系艰难嘅决定：「离开由细长大嘅球会确系唔易，但曼联将会提供新挑战畀我另一阶段嘅职业生涯。」佢又卖口乖大赞领队坦哈格：「任何人都睇到坦哈格令曼联好大进步，当我同佢讨论未来计划，我对嚟紧新一季充满期待。」
