英格兰U21喺今届U21欧国盃3战3胜，前锋安东尼哥顿表现出色，射入1球及1次助攻，呢位22岁新星今年1月以4,500万镑(约4.5亿港元)转会费由爱华顿加盟纽卡素後，交唔出功课，被嘲讽系「水货」，但佢把握今次大赛机会，大踢身价波，扬言要力争下季纽卡素正选。
安东尼哥顿可以胜任前锋同翼锋，被誉为当今英格兰最天才横溢新星之一，所以纽卡素今年1月冬季转会市场不惜重金收购佢。不过，安东尼哥顿因为状态欠佳，不获「喜鹊」领队艾迪侯域重用，哥顿仔亦承认未适应新球队：「我加盟纽卡素後，的确状态不足，球队训练非常高强度，并采取体力型踢法，真系有啲顶唔顺，我希望趁今次参加U21欧国盃，提升状态水平，虽然依家踢到70至75分钟，就开始感到疲倦，但我相信情况会不断改善。」
除咗安东尼哥顿之外，同样今年1月转会，由燕豪芬加盟车路士嘅右翼马度基，喺今届U21欧国盃亦非常抢眼，虽然佢冇入波或助攻，但表现活跃，踢法充满娱乐性，上仗击败德国U21，佢当选最佳球员，8强对葡萄牙U21，随时再有惊喜演出。
