曼联夏天增兵出现重大突破，多个权威媒体证实，曼联同车路士喺周四(29日)就美臣蒙特转会达成协议，「红魔鬼」第4度出价达6,000万镑(约5.9亿港元)，终於获车路士接纳。据报美臣蒙特已同意曼联近30万镑(约297万港元)周薪嘅5年合约，下周将落实转会，成为曼联今夏第1单收购。
24岁嘅美臣蒙特系曼联领队坦哈格首要目标，曼联2个星期前首次出价4,000万镑(约3.95亿港元)被「秒拒」，之後两度提高至5,000万镑(约4.9亿港元)同5,500万镑(约5.4亿港元)都未能成功，曼联一度威胁退出斟介，但最终开出5,500万镑外加500万镑奖金条款，以总值6,000万镑转会成功获车路士放人。
美臣蒙特依家正度假，下周返英就会进行体测同正式签约，据报曼联已经同佢倾掂5年合约，连埋奖金周薪可达30万镑。消息指坦哈格视美臣蒙特为战术核心，佢可以踢般奴费南迪斯嘅「10号」位置，亦可以以「8号」角色同般奴费南迪斯合拍，而且佢可以切换去左翼位置，令拉舒福特可走入中路搵食，令球队战术更加灵活。
