2023年女子世盃下个月举行，巴西女足周三(28日)公布23人决选名单，已经37岁嘅「女球王」玛达克服伤患顺利入选，将会第6次出战世盃决赛周。呢位6届「世界足球小姐」过去5届都同冠军无缘，睇住美斯上年喺男子世盃圆冠军梦，玛达亦有最後机会实现捧世盃冠军梦想。
巴西女足今次点兵，有11人系第1次出战世盃，瑞典籍教练皮娅认为玛达嘅经验非常重要：「玛达系女王、系女足嘅Icon，只要佢喺度已经充满感染力，我唔肯定佢系咪会踢正选，但我已安排佢嘅角色，亦相信佢会做得好好。」
玛达目前仍然受到左膝伤患困扰，但入选世盃大军意义重大，佢之前5次出战世盃都未能夺冠，最接近一次系2007年喺决赛不敌德国女足屈居亚军。巴西女足今届身处D组，同组有法国、牙买加同巴拿马。
