曼联转会市场大龙凤继续上演，据英国传媒报道，西班牙门将迪基亚已铁定离队，呢位效力曼联12年嘅老将原本已同意减薪，并且已经签埋新合约，点知曼联突然改变主意取消合约。喺坦哈格对迪基亚仍有质疑下，曼联认为迪基亚减薪幅度唔够大，所以要求重新谈判，双方继续合作机会极微。
据《The Athletic》报道，迪基亚喺至少1个星期前，已经答应将37.5万镑(约375万港元)周薪减到20万镑(约200万港元)，而且喺曼联开出嘅新约上签名作实，不过曼联最後关头突然取消合约，认为20万镑周薪仍然「太高」，所以要求佢再降低人工，成为续约一直拖延嘅最大原因。
32岁嘅迪基亚同曼联嘅合约喺周五(30日)完结，双方再为新约达成协议机会极低，尤其有沙特阿拉伯球会向迪基亚开出高薪合约挖角。英国《每日邮报》指出，曼联突然反口拒绝续约，系因为坦哈格对迪基亚能力仍有质疑，虽然坦哈格曾多次公开话希望佢续约，但国际米兰门将奥拿拿先系佢心仪嘅门将人选。
