英国传媒报道，曼联除咗卖盘，今夏仲会大清洗，准备出售13名球员，不过离奇嘅系，近期全力抢人才嘅沙特，竟然对曼联呢班球员全部冇兴趣，唔打算接收，点解？
《每日邮报》报道，曼联已开出出售名单，计有哈利马古尼、查顿辛祖、云迪碧克、费特、艾兰加、阿历士迪尼斯、艾历拜利、麦汤米尼、甸恩轩达臣、安东尼马迪尔同3位小将，总共13人。
曼联已对出售球员标价，最贵系查顿辛祖，索价4500万镑，哈利马古尼同麦汤米尼各收4000万镑，安东尼马迪尔同甸恩轩达臣就2000万镑。
相对於车路士近期散货，轻轻松松就卖晒去沙特，曼联呢班球员就唔系咁易出货，至少仲未听闻沙特球队接收。有网友回应称：「沙特系有钱，但唔系傻仔。」可谓一针见血。
仲有一个原因，就系曼联其中一个买家系卡塔尔财团，虽然未落实，但由於卡塔尔同沙特关系并非友好，沙特无意帮曼联接货，所以曼联要出售球员，暂时只能向欧洲各队推销。
