英国传媒统计英格兰国家队成员身家，发现曼联前锋拉舒福特系首富，身家高达6500万镑(约6.5亿港元)，排第2位系由曼城过档车路士嘅史达宁，队长哈利卡尼排第3。
《太阳报》报道，拉舒福特喺曼联周薪为20万镑，不过据报道续约谈判後其周薪将大幅增加到37.5万镑，成为英超顶薪球员，福仔嘅收入除咗波粮，仲有其他赞助同佢推出嘅产品潮物，现时其身家高达6500万镑，加人工後佢嘅身家将会愈嚟愈多，令佢有更多资金去推动慈善事业。
英格兰第2富翁系史达宁，身家估计有6100万镑，佢嘅收入主要来自车路士周薪32.5万镑，以及一连串赞助，而场外佢亦系一间地产公司合夥人之一，令佢财源滚滚。
队长哈利卡尼喺国家队富豪榜排第3，身家5100万镑，同前两位有一段距离，皆因哈利卡尼喺热刺周薪只有20万镑，另加赞助收入，近年佢拓展个人事业，包括物业收租，另外投资食品生意等。不过嚟紧最重要系佢能否转会，无论去拜仁或皇马，对佢足球事业都系一大突破。
英格兰国家队身家前10排名
1. 拉舒福特 6500万镑
2. 史达宁 6100万镑
3. 哈利卡尼 5100万镑
4. 比克福特 3600万镑
5. 劳基梳尔 3200万镑
6. 基尔获加 2700万镑
7. 佐敦轩达臣 2300万镑
8. 美臣蒙特 2000万镑
9. 基亚利殊 2000万镑
