克罗地亚喺欧国联决赛12码饮恨，37岁嘅莫迪历再一次同冠军擦肩而过，呢位赢过「金球奖」嘅天才中场，为克罗地亚参加过9次国际大赛决赛周，拎到2面银牌同1面铜牌，有传佢会喺决赛後宣布退役，不过莫迪历赛後大卖关子，表示对前途已有决定，但唔会喺依家宣布。
莫迪历喺2006年初登世盃舞台，至今已征战过4届世盃决赛周同4届欧国盃决赛周，今次欧国联系佢第9次出战国际大赛，最接近冠军一次系2018年世盃杀入决赛，可惜输畀法国屈居亚军，上年卡塔尔世盃拎到季军後，已经有传莫迪历会退役，但佢决定踢埋欧国联，希望可一尝为克罗地亚捧盃滋味。
被问到喺克罗地亚以及皇家马德里嘅去留问题，莫迪历赛後表示：「我已经有决定，而且非常清晰，不过我今日唔会宣布任何事情。」克罗地亚喺今年9月至11月，会踢晒欧国外剩余6场分组赛，如果莫迪历继续留队，明年夏天仍有机会挑战欧国盃冠军。
