周日(18日)晚欧国联季军战，由荷兰斗意大利。身为主办国嘅荷兰，4强出局後已经冇晒面，唯一目标系攞番个尾彩，就算防线欠稳都照抢攻求胜。重建中嘅意大利以试阵为主，冇心理包袱下随时踢得更放。睇番荷兰近5场法定时间总入球全开3球或以上，再追中位数2.5球嘅入球大。（周日晚9时开赛）
荷兰上仗对克罗地亚先开纪录，点知下半场连失两粒，虽然补时扳平2比2，但加时又失多两球，最终输2比4，就算朗奴高文回巢执教，攻强守弱问题仲未解决。事实上「橙军」传统风格崇尚进攻，要入波唔成问题，但防线谷得太上，往往被对手反击打爆，近5场比赛除咗对鱼腩直布罗陀冇失波，其余4场法定时间共失9粒，今仗面对擅打反击战嘅意大利，难保清白身。
