葡萄牙喺上年世盃悲情出局後，表现饱受争议嘅C朗拿度被指将会退出国家队，不过呢位「打不死」球王未言退，喺新帅马天尼斯带领下继续孭飞，周日(18日)凌晨欧国外J组赛事，C朗第199次为葡萄牙上阵，协助球队主场3比0大胜波斯尼亚，有球迷更突破保安冲入球场，向C朗跪拜兼抱起致敬，场面罕见。
卡塔尔世盃後马天尼斯执教葡萄牙，今仗系佢第3场领军，38岁嘅C朗每场都正选上阵，佢喺前2场都梅开二度，今仗23分钟亦头槌顶入，可惜越位在先惨食诈胡。葡萄牙始终技高一筹，44分钟般奴费南迪斯交出靓直线，贝拿度施华入楔轻松射入，葡萄牙半场领先1比0。
换边後波斯尼亚加强进攻，但葡萄牙77分钟再由般奴费南迪斯头槌建功，呢位曼联中场喺补时阶段锦上添花，个人交出2入波+1助攻成为赢波功臣。比赛期间有球迷拎住葡萄牙国旗冲入场，成功埋身C朗揽到实，之後跪地膜拜兼再抱起C朗，并且做出招牌「Siu」庆祝动作，喺保安赶到前继续「逃亡」，C朗亦全程笑住并唔抗拒。
