世界盃冠军阿根廷访华，将於周四(15日)晚上8点喺北京踢国际热身赛对澳洲，已经第7次访华嘅球王美斯赛前接受内媒专访，表明已经无欲无求，唔会踢下届世界盃决赛周，至於可唔可以获得今年金球奖亦无所谓。
美斯将於6月24日踏入36岁，被问到会唔会为阿根廷出战3年後世界盃进行衞冕，佢话：「就好似我之前咁讲，应该唔会参加下届世界盃，见步行步啦，原则上唔会再踢。」
美斯被视为今年金球奖大热人选，佢对於能否第8次获此殊荣就话：「我职业生涯来到呢个时间，个人奖项已经唔重要，以前最重视世界盃，因为当时我未捧过，我再次强调，集体荣誉超越个人荣誉，如果获得第8个金球奖，当然系好事，如果冇份得奖，亦无所谓。」今年金球奖将於10月30日公布，估计属於美斯同曼城射手艾宁夏兰特之争。
另外，美斯透露仍然同昔日巴塞隆拿恩师哥迪奥拿保持良好关系，大赞佢率领曼城夺得欧联冠军，再次展现伟大主帅本色，至於美斯就话仲未考虑挂靴之後做教练。
