碧咸二仔罗密欧今年1月外借到宾福特B队，至今满半年，呢位20岁翼锋协助球队赢得一项盃赛冠军，B队主帅麦克法兰对佢留下深刻印象，认为佢喺球队「举足轻重」，希望罗密欧留队继续成长。
碧咸3个仔中只有罗密欧踏上足球路，20岁嘅罗密欧喺父亲创立嘅国际迈亚密二队出道，今年初外借到宾福特B队，为期6个月，期间帮球队捧走一项盃赛冠军，依家借用期满，按正常程序佢将会重返国际迈亚密二队。
罗密欧有个前英格兰队长老窦，自然备受注视，宾福特B队主帅麦克法兰强调，罗密欧真系踢得好，球员留队有助成长，佢话：「如果佢留低我会好高兴，过去半季所见，佢喺球队举足轻重，依家一切由罗密欧决定，但我想继续帮佢成长。」
