下季英超最後一支升班球队诞生！卢顿喺升班附加赛决赛，同高云地利激战120分钟踢成1比1，最终互射12码去到突然死亡先赢6比5，拎到英超最後一张入场券。卢顿13/14球季仲踢紧地区联赛，但最近10年坐火箭直冲英超，中场鲁铎克更成为英格兰史上首个跟同一球会连升4级球员，堪称系足坛童话！
上季喺升班附加赛4强饮恨嘅卢顿，今场形势占上风，不过12分钟就有队长洛克尔喺冇任何碰撞下晕倒，要即时送入医院治理。卢顿23分钟凭佐敦奇勒入波领先，高云地利下半场加强进攻，66分钟喺一次快速反击由古斯达禾咸马追平。比赛最终要射12码决胜，卢顿6次射门全中，高云地利就有达保喺第6轮宴客，卢顿得以戏剧性升班。
卢顿喺08/09球季曾因财政问题被扣30分，要跌落地区联赛比赛，不过佢哋好快振作，2014年以101分夺冠升上英乙，2018年再升班英甲，1年之後再冲上英冠，经过上季附加赛出局後，今年终於实现升上英超美梦，卢顿对上一次喺英格兰顶级联赛角逐，已经数到英超成立前嘅1992年。
29岁中场鲁铎克全程见证呢段卢顿童话，佢喺10年前加盟卢顿，正正经历晒10年内4次升班，由地区联赛杀上英超嘅旅程，成为英格兰球坛史上第1人，呢位刚果民主共和国球星赛後讲笑话：「我已经完成晒所有足球使命，我谂可以退休啦！呢段旅程有高山低谷，但我一直相信自己，我已经系英超球员啦！」
