早前曾传出曼城一旦成为英超、英足盃、欧联「三冠王」，领队哥迪奥拿就会「光荣引退」，呢位52岁西班牙名帅终於开腔表效忠，讲明下季仍然会继续执教「蓝月亮」，无惧同球会一齐面对115项财务违规指控。
哥迪奥拿话：「现时我冇谂过离开，将来嘅事边个知，总之我依家冇打算走，想下季继续留队，我唔知一旦输咗呢2场决赛(英足盃、欧联)会有乜感觉，只知道同球会仲有合约在身，我就要尊重球会。虽然我哋面临115项指控，但愿意一齐去面对，大家唔需要担心。」哥帅预言下季英超衞冕之後将更加艰难，因为各支对手都会以击败曼城为目标。
曼城今年2月被英超赛会起诉财务违规，涉及115条控罪，据悉「蓝月亮」於2009至2018年共9年期间，违反多项财务规定，包括未有准确提供财政收入及领队薪酬等，亦未有遵守财政公平规例，及未有配合英超执法调查等，将面临扣分，甚至踢出英超等处分，成为曼城下季一大难题。
