狼队今季一度排英超包尾，上年底请西班牙名帅卢比迪古执教後，成绩大跃进得以护级成功，不过呢位前西班牙国家队主帅近日自爆，答应加盟嗰阵唔知球会有财政公平条例问题，据报佢喺联赛煞科後将同狼队高层会面，唔排除会辞去主帅职务。
狼队喺近2个转会窗用咗超过2亿镑(约19.47亿港元)买人，最终亦成功护级，但卢比迪古最近同球会倾下季计划，就有重大发现：「同主席开完会，我先知道球会有财政公平条例问题，呢件事我上任前完全唔知情，希望可以解决到，唔作出投资喺英超系好难生存。」
狼队上年度财政报告录得亏损4,610万镑(约4.49亿港元)，据报球会为整靓盘数，夏天将会卖走鲁宾尼维斯、阿达马查奥尔同摩天奴等主力，卢比迪古将喺煞科後再同狼队商讨，若果未获保证有资金增强实力，佢会考虑辞职。
