几乎被球迷遗忘嘅法国球星保罗普巴，周五(12日)凌晨欧霸盃4强首回合终於翻生，最後关头送出关键助攻，协助祖云达斯喺补时7分钟1比1逼和西维尔，下周五(19日)次回合赛事会作客西班牙踢生死战，争夺欧霸盃决赛资格。
祖云达斯今仗虽然主场出击，但面对「欧霸之王」西维尔明显被比下去，26分钟西维尔一次快速反击，奥甘波斯右路传中，安尼斯利无人看管下轻松射入。祖记下半场变阵略有起色，70分钟入场嘅保罗普巴表现活跃，终於去到补时7分钟，保罗普巴底线前头槌传中，由另一後备奇兵加迪喺龙门口顶入，追成1比1完场。
30岁嘅保罗普巴上年约满曼联後，重返祖记即长期养伤，复出之後连1场正选都未做过，今场就踢出加盟以来代表作，教练阿里基赛後亦点名大赞：「当保罗普巴喺对方半场踢，佢就系最顶尖嘅球员，如果佢嘅状态良好，我肯定会畀佢打正选，佢可以作出重大贡献。」
