当全世界等紧睇曼城前锋艾宁夏兰特喺周三(10日)凌晨欧联4强首回合大肆数胡嘅时候，呢位挪威「入球机器」却死火，皆因皇马中坚鲁迪格踢出超卓水准，成功将呢位22岁超级射手冻结。
艾宁夏兰特今季各项赛事为曼城上阵47场入51球，表现所向披靡，但今场演出非常沉静，踢足90分钟只有21次触球，属於全场球员之中最少，而且仅有13次传球，仲少过队友门将艾达臣摩拉斯6次。
夏兰特想掂波都困难嘅情况下，更加唔使旨意入波，以10分为满分，夏兰特被西班牙《马卡报》评为3分唔合格，反观给予鲁迪格10分满分。
皇马主帅安察洛堤亦大赞鲁迪格表现：「鲁迪格太出色，简真系顶级表现，佢拥有丰富经验及高质素能力，今场唔易踢，佢踢得非常好，我为佢感到高兴。」网民亦纷纷吹捧呢位30岁德国国脚，认为佢踢出大师级水平，并话如果佢仲效力紧车路士，夏兰特就唔可以喺英超横行无忌。
最令人奇怪系夏兰特被鲁迪格冻结之下，曼城领队哥迪奥拿今场并冇作出任何换人调动，似乎对於和波感到满意。
