修咸顿喺英超护级生死战3比4不敌诺定咸森林之後，极大机会降班，势必面临主将「跳船」危机，阵中「罚球专家」禾特普斯成为豪门争夺目标，有望转投纽卡素或者热刺，下季继续踢英超。
现年28岁嘅禾特普斯属於修咸顿青训产品，今仗射入1球12码，佢自从2012/13年球季首次踢英超以来，已於联赛累积射入30粒死球，包括射入17个罚球及13球12码，同期仅少过入33粒死球嘅热刺前锋哈利卡尼。
值得一提，禾特普斯仲系英超史上射入第2多罚球嘅球员，仅次於入18球嘅曼联名宿碧咸。曼城主帅哥迪奥拿曾经大赞呢位英格兰国脚系佢见过最佳罚球射手，相信一旦修咸顿降班，大把英超大球会争住签禾特普斯。
禾特普斯今季各项赛事上阵42场入10球及3次助攻，佢将於2026年约满，纽卡素、热刺最兴趣收购呢位「罚球专家」，估计佢身价达到3,800万镑(约3.76亿港元)。
