艾宁夏兰特哑火情况下，曼城靠中场奇云迪布尼入波逼和皇马1比1，呢位31岁比利时国脚喺欧联淘汰赛累积入11球，正好同皇马名宿兼前主帅施丹睇齐，难怪被誉为自呢位法国球王之後，近17年欧洲最佳中场球员。
曼城落後之下，哥帅嘅传控及压逼战术，根本对皇马起唔到作用，射手艾宁夏兰特亦被对手冻结，「蓝月亮」陷入困局下，需要1位能够以一己之力改变战局嘅球员，奇云迪布尼发挥王牌角色，挺身而出以一记远射拯救曼城，当选为今场官方最佳球员，绝对实至名归。
事实上，奇云迪布尼射入世界波，绝非偶然，因为佢职业生涯14个欧联入波有7球喺禁区外射入，曼城苦无破门计策之下，正好畀奇云迪布尼发挥远射能力。
值得一提，赛後奇云迪布尼同「奸夫」皇马门将泰拔高图尔斯拥抱，两人虽然系比利时国家队队友，但素有积怨，高图尔斯曾经被指「偷食」迪布尼女友，今仗迪布尼一脚射爆对方，乜仇都报晒。
