近日喺巴黎圣日耳门(PSG)陷入禁赛风波嘅美斯，自拍片道歉後紧张局势明显舒缓，周二(9日)凌晨正式重返PSG复操，同时带埋老婆出席巴黎举行嘅「体坛奥斯卡」，领取劳伦斯最佳男子运动员奖项，佢今次击败韦斯塔本、拿度、杜普兰蒂斯、史堤芬居里同PSG队友基利安麦巴比等人当选，继2020年後第2度拎到呢个大奖。
上年底带领阿根廷赢得世界盃冠军嘅美斯，得奖後表示：「我要多谢我所有队友，唔单止系阿根廷国家队，仲有巴黎圣日耳门嘅队友，自己一个人唔可能有呢个成绩，好开心可以同佢哋分享呢个殊荣。呢个奖令我体育成就更加丰富，睇下以往嘅得奖者，舒密加、活士、拿度、保特、咸美顿、祖高域，全部都系体坛传奇。」
阿根廷国家队亦拎到劳伦斯最佳队伍，令美斯成为史上首个单年囊括最佳运动员同最佳队伍嘅人。美斯喺颁奖礼成为其他运动员争相合照目标，勇夺「最佳极限运动员奖」嘅「滑雪女神」谷爱凌，亦喺社交网公开同美斯合照。
PSG周二喺社交网亦宣布美斯已经回归操练，并贴上佢着住练习衫训练嘅相片，呢支法甲榜首球队会喺周日(14日)凌晨主场迎战阿些斯奥，如无意外美斯可以候命上阵。
