周一(8日)凌晨英超大战，阿仙奴作客2比0击败纽卡素，以1分落後踢少1场嘅榜首曼城，争标仍然「未断气」。阿仙奴队长马田奥迪加特今场又入波，今季英超累积15球，追平法比加斯(09/10球季)成为球队史上单季入波最多中场球员。
纽卡素同阿仙奴今场快上快落，战情非常精彩，主队开波2分钟就有积及梅菲射门中柱，劣势嘅阿仙奴14分钟就由马田奥迪加特禁区外远射建功。「兵工厂」领先後愈踢愈好，加比尔马天尼利同布卡约沙卡先後单刀，但逃唔过尼克普比十指关。
换边後纽卡素积极反扑，48分钟阿历山大伊沙克近门又顶中柱，另一边阿仙奴亦有加比尔马天尼利妙射中楣弹出，呢位巴西翼锋71分钟单骑硬闯，杀落底线传中逼到法比安舒哈摆乌龙，阿仙奴最终保持2比0胜局至完场。
虽然争标形势处於被动，但阿仙奴领队阿迪达赛後表明唔会放弃：「输畀曼城之後，好多人都话争冠已经冇可能，但我哋唔锺意放弃，我唔会接受任何一个球员、职员放弃，未来嘅事冇人知，我哋要继续前进，唔可以浪费之前10个月嘅努力。」
