美斯同巴黎圣日耳门(PSG)之间矛盾不断扩大，令体坛重量级颁奖礼劳伦斯都受牵连。本年度劳伦斯颁奖礼定於周二(9日)凌晨在巴黎举行，大会官网於周一提前「泄密」美斯当选最佳男子运动员，但美斯好大机会唔返巴黎，唔会去现场领奖。
2020年首次当选嘅美斯，凭去年带领阿根廷夺得卡塔尔世盃嘅表现，力压一众体坛名将第2度当选劳伦斯年度最佳男子运动员殊荣，颁奖礼安排喺巴黎举行，原本美斯「行过对面街」就可领奖，但偏偏最近佢同PSG之间嘅关系破裂，殃及颁奖礼池鱼。
美斯同PSG续约谈判停滞，最近美斯请假到沙特出席活动，竟被PSG指缺席操练而予以重罚，就算美斯拍片道歉都未得到原谅，双方关系跌至冰点，加上不时受到球迷抗议及喝倒采，美斯今夏离队几已成定局，劳伦斯颁奖礼撞正喺佢受罚期间举行，为避免尴尬，美斯只好潜水唔去颁奖礼。
