曼城上仗英超以2比1击败列斯联，发生小插曲，「蓝月亮」比赛末段获得12码，但首席「刽子手」艾宁夏兰特却违反领队哥迪奥拿指令，让畀根度简主射，不幸宴客，激到哥帅紮紮跳。英国网民指夏兰特可能顾及爸爸「老夏兰特」曾效力列斯联，唔想亲自射死对手。
当时曼城凭根度简梅开二度领先2比0，只要入埋12码，领先3球就好稳阵，但呢位德国国脚却射失，转个头仲畀列斯联追至1比2，几乎失分。
艾宁夏兰特决定「让射」12码时候，哥迪奥拿已经喺边场大嗌叫佢射番，点知呢位挪威国脚都系唔听。英国网民指除咗夏兰特想畀根度简完成帽子戏法之外，亦可能考虑到「老夏兰特」效力过列斯联，自己更加喺列斯联所在城市出世，唔忍心亲自解决呢支深受降班威胁嘅「家乡球队」。
赛後哥迪奥拿接受传媒访问时仍然好嬲：「我哋主射12码首两位人选系夏兰特同马列斯，英超领先2球并唔安全，根度简有承担去操刀，值得欣赏，但重点系必须根据事先安排，由指定球员主射，特别系夏兰特，佢系呢方面专家。」
