周五(5日)凌晨英超赛事，曼联作客同白礼顿大激斗，双方合共炮制38次攻门，但唯一入球要到补时9分钟先出现，曼联中坚劳基梳尔离奇手球送12码，白礼顿得以绝杀赢1比0。曼联输波後仍然有4分优势坐喺第4位，但利物浦同白礼顿已步步追逼，最後5轮联赛唔可以大意。
两队上月喺英足盃4强交锋，踢足120分钟都冇波入，最後曼联互射12码晋级决赛，今场双方继续踢到难分难解。曼联开波2分钟就有黄金机会，但安东尼马菲奥斯单刀射斜，转个头轮到白礼顿翼锋三笘薰
单刀，但射门省中迪基亚块面；两队门将之後都有多次美妙扑救，令战况僵持。
比赛尾段白礼顿开始围攻曼联，阿历斯麦亚里士打割草式劲射被迪基亚仅仅扑出柱边、摩西斯卡些度窄位狂抽又逃唔过迪基亚五指关，以为会互交白卷之际，劳基梳尔突然喺一次角球入面「抢篮板式」手球，球证睇VAR後判罚12码，由阿历斯麦亚里士打喺99分钟射入致胜一球。
输波罪人劳基梳尔赛後解释：「喺最後1分钟输波特别痛苦，我只手唔应该喺嗰个位，系我令球队输波。我解释唔到只手点会咁，我感觉到畀人推撞，而且导致角球之前个罚球根本系错判，我唔系想搵藉口，讲到底我举高只手就系一个愚蠢错误。」
曼联依家踢33场有63分，比第5位嘅利物浦多4分兼踢少场，不过更大威胁系今场赢波嘅白礼顿，佢哋有55分但系比曼联又踢少1场，如果赢埋手上面嗰场就只落後「红魔特」5分，最後5轮联赛仍然有变数。曼联下周一(8日)凌晨会作客韦斯咸。
