爱华顿目前喺英超陷入降班漩涡，最後5场联赛当决赛咁踢，冲刺时刻就靠晒前锋卡维特利云，呢位英格兰射手今季长期受伤患困扰，不过领队戴治上任後就将佢彻底「改造」，希望佢可以健康比赛。据报阿仙奴对卡维特利云虎视眈眈，有意夏天抢人。
戴治喺2月上任後，首仗就喺卡维特利云挂帅後，爆冷1比0击败阿仙奴，但长期受伤患影响嘅卡维特利云亦喺该仗伤出，缺阵之後10场联赛，直到最近2仗先至复出。据报戴治喺呢段时间，为卡维特利云彻底改造：「我同医疗团队深入调查，审视佢嘅训练计划、奔跑距离、奔跑速度、饮食习惯、生活习惯、睡眠时间，甚至揸边款车同用边种枕头，令佢可以『重新做人』。」
