车路士继续沉沦，佢哋周四(27日)凌晨英超主场0比2输畀宾福特，令看守领队林柏特上任後录得5连败，史丹福桥球场喺最後15分钟已经走咗差唔多一半球迷。赛後大批车迷网上留言，希望车路士尽快宣布普捷天奴接手，以免呢位名帅吓亲「转軚」。
状态低迷嘅车路士，今场继续赢形势唔识入波，全场有73%控球率，但37分钟就有艾斯派古达摆乌龙，78分钟再被麦比奥莫反击攻陷，最终输0比2完场。林柏特上任後领军5仗全败，其中有4场冇波入，呢位看守领队赛後表示：「我明白球迷嘅嘘声，但我会保护球员，因为佢哋系一班好想赢嘅年轻人。车路士有信心同结构问题，球迷唔会明白背後嘅难题，我只系尽力保护球员。」
盛传普捷天奴已经口头答应接掌车路士帅印，赛後大批球迷留言：「请尽快宣布普捷天奴上任....趁佢未改变主意之前」、「林柏特已经冇能力改变，快啲请普捷天奴」、「保利请应承普捷天奴任何条件，我哋顶唔顺林柏特啦！」
