阿仙奴作客1比4惨败曼城脚下，争标机会变得渺茫，领队阿迪达赛後承认今场「优胜劣败」，以佢哋目前实力好难同巅峰嘅曼城争霸。不过，阿仙奴今场亦完成一个「使命」，佢哋已锁定下季欧联参赛资格，阔别6季後重返欧联赛场。
今仗被曼城技术性击倒，阿迪达赛後表示：「我哋输畀一支更出色嘅球队，曼城今场踢得非常好，要去到呢个水平非常困难，阿仙奴仲差好远。我哋知道曼城嘅能力，但今场冇办法挡得住，或者我哋要睇更宏观画面，阿仙奴今季可以同曼城咬住咁耐已经好神奇。季前数据话阿仙奴会排第6或者第7，但我哋依家排名唔系咁，曼城系一支超卓嘅球队，我哋都系一支好好嘅球队。」
虽然争冠大势已去，不过阿仙奴季前以前4名为目标就提早完成，随住白礼顿周四(27日)凌晨作客1比3输畀诺定咸森林，阿仙奴数字上已经肯定确保前4名位置，将会自16/17球季後重返欧联赛场。「兵工厂」过去6季有5季出战欧霸盃，21/22球季继无缘欧洲赛事，今季已经算系超额完成。
