曼城王者降临！周四(27日)凌晨英超榜首大战以一面倒姿态结束，曼城主场以4比1大炒阿仙奴，虽然仍以2分落後「兵工厂」，但踢少2场嘅曼城已重夺争冠主导权，最後7轮联赛赢6场就足够封王。曼城双星艾宁夏兰特同奇云迪布尼今场大爆发，两人合作摧毁阿仙奴後防，堪称欧洲最强连线！
曼城一开波已经上力，7分钟一次简单反击，艾宁夏兰特中场控定後，弹畀後上嘅奇云迪布尼长驱直进射入；阿仙奴之後继续捱打，上半场补时阶段史东斯接应奇云迪布尼罚球顶成2比0。控制战局嘅曼城54分钟再由艾宁夏兰特妙传奇云迪布尼射入，锁定今场关键胜仗。
比赛最後阶段已进入「垃圾时间」，86分钟阿仙奴凭洛贺丁禁区内抽射破蛋，但系曼城仍未收够筹，今场多次错失机会嘅艾宁夏兰特，补时5分钟接应菲尔科顿妙传射成4比1，呢球亦系佢今季英超第33球，打破英超38场时代嘅单季最高入球纪录。
曼城依家落後阿仙奴2分但踢少2场，争冠形势一片光明，Opta数据预测曼城有92.06%机会捧盃，曼城领队哥迪奥拿赛後表示：「呢个系我想要嘅位置，主动权已经喺自己手上，但我哋先要赢咗未踢嘅2场比赛，未来3仗非常非常重要，我哋只需要赢晒自己嘅比赛。」
哥迪奥拿亦点名大赞艾宁夏兰特同奇云迪布尼嘅组合：「夏兰特畀迪布尼、迪布尼畀夏兰特，呢个组合嘅威胁对球队非常重要，当对手想压逼我哋，佢哋两个就会利用後面嘅空位制造好大威胁。」
