近期状态回勇嘅韦斯咸，周日(23日)英超作客4比0大胜般尼茅夫，拎到护级重要3分，今场最大话题系韦斯咸4比0嘅入波，柏保路科奴斯以「蠍子摆尾」轰入，姿势分拎足100分，唔少球迷都话佢拎硬「英超全年金球」。
科奴斯今场喺65分钟後备上阵，几分钟後就射入金球，当时佢接应查洛保云传中，虽然冲咗去个波前面，但佢灵光一闪跳起用後脚勾个波，虽然踢得唔系太正，但依然射出个弹地波入网。呢位西班牙中场庆祝嗰阵激动爆喊，佢赛後表示：「我系最後一个接应嘅球员，当时只想尽量接触个波。今季对我嚟讲唔容易，所有人都希望落场比赛，所以当我有机会上阵......呢场波对韦斯咸好重要，入波对我亦意义重大。」
科奴斯今季喺英超只踢过12场正选，领队莫耶斯赛後亦承认「於心有愧」：「科奴斯系非常、非常好嘅球员，佢今季上阵机会唔多，但完全唔关佢嘅能力问题，我都好希望可以搵到更多时间畀佢踢。我明白点解佢入完波咁激动，佢好希望落场比赛，佢值得有呢个入波。」
