英超劲旅利物浦今季成绩大倒退，依家只系排喺联赛榜第7位，莫讲话争入前4踢欧联机会渺茫，就连出战欧霸盃都唔系咁容易。不过多得曼联杀入英足盃决赛「带挈」，利物浦依家只要保住第7位，已经可以出战欧协联，亦有机会挑战欧霸盃资格，有望逃过下季「脱欧」命运。
英超嘅欧洲赛席位安排，本来系联赛前4名踢欧联，第5名同英足盃冠军踢欧霸，英联盃冠军就踢欧协联，但随住曼联踢走白礼顿入英足盃决赛，英足盃冠军将会落喺曼城或曼联手上，两队如无意外都会系英超前5名，所以第2个欧霸盃席位会转移畀英超第6名。由於曼联同时亦系英联盃冠军，所以欧协联亦都会转移畀英超第7名球队，意味利物浦只要保住前7名就会有得踢欧洲赛。
利物浦依家有50分排第7位，比第8嘅白礼顿只多1分但踢多2场，不过佢哋同阿士东维拉(51分)、热刺(53分)都非常接近，欧洲赛资格竞争将会非常激烈。
