阿根廷球王美斯回归巴塞隆拿愈传愈烈，据西班牙《每日体育报》报道，美斯一家人喺周六(22日)飞返巴塞隆拿屋企，奇怪嘅系佢哋同时带咗15箱行李，明显唔系「返一返去」咁简单。西班牙记者罗美路透露「有事即将发生」，暗示巴塞隆拿同美斯签约好事近！
巴黎圣日耳门(PSG)上星期五(21日)对昂热後，有超过1个星期空档时间，据报美斯一家人就同私人助理、朋友一齐由巴黎飞返巴塞隆拿，而且仲拎埋15箱行李，完全系「搬屋」规模嘅迁徙。巴塞跟队记者罗美路喺社交网表示：「今次唔系简单嘅回家」、「有事即将发生」，令球迷有无限联想。
西班牙媒体近日报道，PSG喺美斯续约一事已经准备放弃，佢哋希望腾出薪酬空间进行重建，令美斯「回归」巴塞机会大增，虽然巴塞本身亦受到财政问题困扰，但美斯为完成重返巴塞嘅愿望，将会乐意大幅减薪去促成转会。
