C朗拿度加盟艾纳斯後一度系威系势，不过近期就步入「黑暗期」，近2场联赛失5分後争标已处下风，周二(25日)凌晨沙特国王盃再以0比1不敌艾维达出局，表现低沉嘅C朗继续躁底，半场期间被影到向住自己教练团大发牢骚。
艾纳斯喺4强主场迎战弱旅艾维达，上半场被对手一记精彩入球落後0比1，半场完结期间，明显唔满意嘅C朗边拧头边行出场，去到场边突然向住教练团摊开双手大发牢骚，似乎埋怨教练嘅战术安排。换边後C朗喺55分钟博到对方食红牌，但打多1个嘅艾纳斯仍然入唔到波，最终输0比1出局。
艾纳斯近3场比赛1和2负，教练鲁迪加西亚月初被炒鱿後，仍然未有新教练上场，依家暂时由U19教练谢利锡代领军，如果唔尽快执番好，C朗喺沙特阿拉伯首季好可能1个冠军都拎唔到。
