热刺周日(23日)英超作客1比6惨败纽卡素脚下，开波21分钟狂失5球令球迷哗然，队长洛里斯赛後狂插球员嘅作战态度，网上疯传呢位法国门将半场期间同队友吵大镬，之後更拒绝上阵踢下半场，不过洛里斯赛後就作出否认，解释自己系受伤先冇踢下半场。
热刺半场输紧0比5，下半场洛里斯就由费沙科士打入替，《Prem Inside》消息指洛里斯半场期间，喺更衣室内同队友发生冲突，并且拒绝继续上阵。洛里斯赛後解释：「我嘅肋骨附近肌肉有啲事，踢龙门球嗰阵感觉到唔妥，要等之後检查睇下咩事。」
虽然洛里斯否认罢踢，但赛後仍然炮轰队友嘅态度：「今场真系好尴尬，第1件事应该系向球迷道歉。唔好讲战术问题，我哋系连作战能力都冇，所有波都慢人一步，好难分析今场嘅表现，但最明显嘅系球员缺乏荣耀感，如果落场都冇战斗慾望，真系会好难打。」
