力争成为盃赛「双冠王」嘅曼联，杀入英足盃决赛後即传噩耗，喺对白礼顿一仗伤出嘅般奴费南迪斯，怀疑伤势严重，佢老婆喺社交网发布相片，见到呢位葡萄牙国脚要着保护靴兼用拐杖，周五(28日)凌晨作客热刺嘅英超大战好可能缺阵，要休息几耐亦系未知数。
般奴费南迪斯喺英足盃对白礼顿嘅上半场足踝受伤，领队坦哈格曾打算将佢换走，不过般奴费南迪斯坚持继续比赛，结果踢到101分钟先至退下火线。佢离开球场嗰阵虽然一拐一拐，但唔需要任何辅助工具，令人觉得佢伤势唔重，但佢老婆Ana Pinho日前喺IG贴上般奴费南迪斯喺屋企休息相片，就见到佢着保护靴兼用拐杖，似乎伤势唔轻。
曼联官方仍未就伤兵情况作出更新，但周五对热刺嘅联赛几乎肯定唔踢得。曼联近期伤兵不断出现，利辛度马天尼斯、华拉尼都要养伤，麦汤米尼同加拿祖亦未伤愈，坦哈格可以用嘅球员捉襟见肘。
